「請注意頁底重要聲明」
大家好！漁得水又跟大家見面！
前陣子看到網上平台，有苦主聲稱俾財演佬呃，買入一隻細價股/莊家股，輸身家！究竟坊間聲稱的CCASS 數倉大法，是否堅work? 大戶手影真係咁公開? 咁易俾你睇到？今日同大家探討一下CCASS呢個神秘面紗。
CCASS (Central Clearing and Settlement System，中文簡稱中央結算系統) ，是一個協助香港上市公司，提供證券買賣而設的電腦賬面交收系統。CCASS系統於1992年開始啟用，投資者可透過CCASS査詢各證券商的持倉記錄，更容易掌握上市公司的完整資訊及增加市場透明度。
在香港，投資者有兩種持股方式: (1)是實物股票及(2)中央結算系統中的電子記錄(CCASS)。銀行或證券行代投資者買賣證券，通常會透過中央結算系統保管及交收，存放於中央結算系統中。由於存入中央結算系統的股份會以中央結算系統代名人(即香港中央結算（代理人）有限公司) 的名義登記，故投資者只是股份的實益擁有人，所有公司通訊和權益將因此交予中央結算系統代名人，然後透過相關經紀和銀行轉交實益擁有人。
相信有炒開細價股嘅朋友都有試過用HKEX 網站裏面的CCASS系統。以前我啱啱大學畢業，就聽人講，大戶散完貨喇，你睇，啲貨入哂幾間本地大型銀行手中（包括：滙豐銀行、恒生銀行、中銀、渣打銀行），意思指大戶在某證券行的持倉，已成功派到散戶手中。因為一般散戶、師奶只會用大型銀行代為買賣及持倉。一般初學投資者可能對CCASS比較陌生，其實投資者可透過CCASS免費查詢過去12個月上市公司的紀錄， CCASS中央結算系統的數據分析功能，更可以有條件進行以下篩選：-
1. 參與者持倉量 (某證券行大量持有)
2. 參與者持倉排名
3. 持倉分佈集中度 (股權集中度)
4. 參與者數目
5. 參與者持倉變動 ("射倉"或其他財技活動)
6. 中央結算總持股量
7. 中央結算持股變動
所有聯交所證券買賣須於T+2日交收，投資者買賣股票(T日)，實際交收時間是進行交易當日後第二個工作天(T+2)，故5月5日CCASS紀錄顯示兩日前交易狀況(即5月3日)。
中央結算系統持股紀錄查詢服務(CCASS)網站: https://www.hkexnews.hk/sdw/search/searchsdw_c.aspx
舉個例子1: 用中國建築國際 (3311HK)做個示範，今日5月6號，港股跌近800點，到20000 點左右。3311HK 微跌1.76%，見到盤中「中國投資信息有限公司」即北水正在排隊買入。然後我哋登入CCASS系統，見到市場中介者有43.55%,即代表有6成貨冇入CCASS倉，有機會大股東持有實貨(紙質股票)，唔想入倉。實貨持有的變化亦值得關注，實貨持有轉為CCASS，反映流通量增加，相反，CCASS轉為實貨持有代表着流通量減少，這意味着會提高供求的敏感度，若果股價處於低水平，炒高的機會越高，對後市的影響亦愈大。
從上圖中可以看到，3311HK這隻股票最大倉是匯豐銀行，佔15.62%, 而我哋成日講嘅北水（透過滬港通買入），持倉登記就係A00003, 中國證券登記結算有限責任公司，而透過深港通買入的持倉登記則是A00004， China Securities depository and clearing。投資者可以留意CCASS系統中券商的持股量變化去估計大戶/大型基金公司的動向。一般來說，若基金或股東從場外大手增持或減持股份，往往都會影響股價升跌及未來走勢。
例子2: 思捷環球(330HK)
最近思捷環球(330HK)忽然炒高到$1.68, 起逆市炒高近2倍，有KOL出嚟認叻，話一早叫人$0.8入。我即時入漁夫系統睇吓，其實系統起上年年尾$0.7已經出「破」訊號, 嗰時個個炒美股，重嫌棄你港女行得慢！如果我哋入去CCASS掃吓倉，最大倉係中南，持有17.1%(5月5日持倉表顯示），即資深投資者人莊生間證券行，而他太太維他奶(345HK)後人羅琪茵更是持有27.92%的大股東。羅氏前年於市場不斷收集其股份，整個股權累積過程在$0.7-$1.09之間買入，如果用平均價$0.9計，賺了近86%。再睇深啲，邢李㷧三個愛女，邢嘉倩、邢愛林、邢言愛，在2021年2 月10日已在$0.9分別減持股份。而羅琪茵則變相不斷增持。另一個企業動作就是，去年3月由Imagi Brokerage Limited包銷的2供1供股，作價$0.75元，已錄得超額認購。近兩年，思捷除了進行供股，還有多項人事變動，更自2017年以來首次發盈喜，扭虧為盈。思捷是否轉型成功，有後著?還是已經炒作完畢，大家自己可以研究一下。
CCASS用法大概係咁，當然你要好有想象力及時間去研究邊間證券行係莊家行，如果入去睇，頭五大持倉證券行已經係莊家泊碼頭，咁即係收乾哂，如果個莊又籌到旗，錢到位，可能隨時開車！睇番330HK呢個case, 2020年7月開始收集，差唔多用咗1年半先開車，你啲資金係未容許你等咁耐? 反正炒細價股都係sell a dream, 例如：公司轉虧為盈、注入新項目、轉新管理層、業務轉型等等。公司要收集、轉型、包裝，再借勢炒高，大約1-2年時間。
提外話：妨間所謂靠數CCASS倉坐大戶順風車，唔好咁上心，啲莊家都唔係傻仔，佢認得啲幫莊牌，人哋個炒房日日數倉，即係知道邊條係魚，唔係自己友拎咗佢啲貨，孤寒莊隨時打低10檔叫你嘔番出嚟，佢先再行上去。
重要聲明：股市漁夫內的所有內容，包括本影片，絕不構成任何投資意見或購買任何股票及金融產品的特定推薦意見及/或不構成任何游說或要約，以購買、出售或以其他方式交易任何證券、期貨、期權或其他金融工具或其他產品，漁夫系統的內容亦並非就任何個別投資者的特定投資目標、財務狀況及個別需要而編製。投資者不應只按漁夫系統的內容進行投資。用戶必須留意，漁夫系統的所有訊號，並非是買賣訊號或任何投資建議，而所有訊號均是全自動用第三方提供之客觀市場數據計算出來的結果，當中並不涉及任何人為的想法、修改、修訂或任何投資建議。本網站包含的所有內容、資訊、訊號，並不針對任何特定的投資目標、財務狀況以及可能使用或接收該內容的特定人員的特定需求。在作出任何投資決定前，投資者應考慮各種金融產品的個別特點、個人的投資目標、可承受的風險程度及其他因素，並適當地尋求獨立的財務及專業意見。
