「請注意頁底重要聲明」
經常聽到有人教Short Put賺取期權金，個個月有錢收的確好吸引，值得做嗎？漁夫認為這做法並不可取，原因如下⋯⋯
我看過不少在期權市場賺億億聲美金嘅對沖基金經理訪問，例如Universa嘅Mark Spitznagel，都是用類似Long價外期權嘅策略去賺他們口中的insurance-like payoffs (i.e. explosive profit)！當然佢地做法無咁簡單，但是概念近似。
Spitznagel曾經在一個彭博訪問中被問及，為何他們在2018年2月閃跌中沒有輸錢（主持以為Spitznagel好似大部分人一樣做Short Volatility），Spitznagel的回應是⋯⋯I am fundamentally on the other side of that trade，即是2018年一月股市急升時Universa已經揸住一些類似VIX價外Call的衍生工具預防閃跌！
“The real black swan problem of stock market busts is not about a remote event that is considered unforeseeable; it is rather about a foreseeable event that is considered remote.” -- Mark Spitznagel
漁夫技巧未夠班，於2018年2月未閃跌前，足足白交了幾個月VIX價外Call期權金做portfolio protection，每次出手佔組合不足1%，最後期權爆升，支出與收穫有點似以下Nassim Talab書入面幅圖⋯⋯
當散戶做Short Put，諗住賺盡100%期權金時，記住Spitznagel可能係你嘅對家 (on the other side of your trade)，等待賺他口中的insurance-like payoffs（期權金數以十倍甚至幾十倍計）。
“One thing Mark Spitznagel taught me was that when someone isn’t afraid of losing small amounts of money, they’re almost invincible.” -- Nassim Taleb
2018年2月就有唔少Short VIX Call嘅散戶，一舖清袋輸凸幾年來所賺到的錢，同期Universa反而大賺，引來彭博監製揾Spitznagel做訪問，可惜主持人又係一如既往問錯問題，浪費了這個學嘢機會。
沽期權大輸的經典例子要數當年的Nick Leeson，1994-95年大手Short日經指數Put+Call（即是Short Straddle），後來神戶大地震令指數波幅突然增加，Leeson即時輸爆倉，拖垮了霸凌銀行這間百年老店！
Short Put的對象通常都是橫行或上升中的股票或指數，但橫行股票的引伸波幅低，期權金只有雞碎咁多，萬一正股向下破，平倉隨時要10倍奉還！況且衰股也有機會被收購令股價爆升，所以Short Call更危險（covered call除外）。這正正是Win Rate高，但risk-to-reward低嘅問題⋯⋯更危險的是，Short Put/Call賺左幾次easy money後散戶就以為好容易個個月有錢賺，然後加大注碼⋯⋯最後上得山多終遇虎輸獲甘，有做過呢類操作嘅朋友，一定知道我講乜。
事實上，漁夫間中會做呢類人嘅對家，我一啲都唔介意連續幾個月白交少少期權金等爆邊，心態就好似釣大魚要出錢買沙蟲做魚餌。引伸波幅未擴闊前，Long價外期權嘅risk-to-reward非常吸引，一爆就有機會贏返10X有凸，原因是引伸波幅突然大增，令期權價值爆升，最近例子就係2020年二月初，當時人人認為COVID-19係小事，漁夫和漁民當時都有Long超價外VIX Call當買保險，最後疫症爆發，個Call狂升了幾十倍！另一次係2018年第四季初，當時人人睇利率向上，漁夫做法是反其道而行，Long美國長債價外Call博聯儲局收錯水 (policy mistake)，初初白比三個月期權金，去到12月股市恐慌，長債價外Call爆升了十倍有多！
做這類Long價外期權交易一定要預咗Win Rate低，有3成命中率已經不錯，加上要與市場共識對着幹，所以一般人不能駕馭這類操作，因為輸得幾次覺得無癮就會放棄。
和漁夫系統的訊號一樣，期權遊戲着重risk-to-reward，只要5次中有一次中便應該有錢贏，如果捉到一次爆升爆跌股，更有機會大賺一筆！重點是不能做幾次便計數，要長期打計平均風險與回報的比例是否對自己有利，專業投資者均深明此道。
之前見到一個外國「專家」教人買金鑛股ETF GDX Call，講了差不多十分鐘癈話⋯⋯目標係賺一倍，即係risk-to-reward比例係1對1，值博率非常低，好心唔好亂教。坊間越來越多呢D咁嘅班，收成幾皮嘢，散戶不如用同一畢錢落場Long價外期權，攞吓實戰經驗好過。漁夫系統內的突破股可以是Long Call的對象，尤其是於整固階段引伸波幅低的股票。利用系統內「以小博大」icon，就可以一目了然看到有什麼股票近排出了訊號。
另一種散戶毛病就係Short Put上升中的股票，這種做法亦屬不智，咁樣做無非想平價買入好股，但牛市期間好股又點會平賣比你？所以每月所賺的期權金遠比揸正股或Long Call少。到熊市到來，好股又隨時跌5成以上，被迫高價接貨。
當年金融海嘯，圈中一位老手，升市時用Accumulator「收息」，這工具基本上等同一次過大手Short了12個月Put，然後每個月收期權金當利息。到2008年他老人家再加槓桿做，話好股「怕乜嘢」低兩成接⋯⋯結果係他被綁死於熊市期間，高市價4-7成連接12個月「好股」，接到3億身家也不夠賠，六十幾歲人先嚟輸身家，都係因為「有息收」累事。
每次做期權交易，都要猜猜對手是誰，對家係漁夫的話閣下未必要擔心，但如果係Spitznagel，幾乎可以肯定遲早要勁輸一舖，加上莊家定價是用複雜電腦程式計，散戶揸住「專家」老師珍藏的陳年Excel表，究竟憑什麼可以贏期權莊家？一般來說，當個市正常上落，莊家計價唔會出錯，漁夫每次出手係博莊家低估了尾部風險嘅可能性（或預期positive black swan出現），有興趣可以睇返電影Margin Call，重溫當年投行如何低估次按危機這個tail risk。
都係果句，漁夫的期權知識十分有限，自問無本事教人期權操作，分享只係想指出一些謬誤。
2021年已經去到尾聲，漁夫在這裏祝福大家 2022年行大運，身體健康，心想事成！
重要聲明：股市漁夫內的所有內容，包括本影片，絕不構成任何投資意見或購買任何股票及金融產品的特定推薦意見及/或不構成任何游說或要約，以購買、出售或以其他方式交易任何證券、期貨、期權或其他金融工具或其他產品，漁夫系統的內容亦並非就任何個別投資者的特定投資目標、財務狀況及個別需要而編製。投資者不應只按漁夫系統的內容進行投資。用戶必須留意，漁夫系統的所有訊號，並非是買賣訊號或任何投資建議，而所有訊號均是全自動用第三方提供之客觀市場數據計算出來的結果，當中並不涉及任何人為的想法、修改、修訂或任何投資建議。本網站包含的所有內容、資訊、訊號，並不針對任何特定的投資目標、財務狀況以及可能使用或接收該內容的特定人員的特定需求。在作出任何投資決定前，投資者應考慮各種金融產品的個別特點、個人的投資目標、可承受的風險程度及其他因素，並適當地尋求獨立的財務及專業意見。
