大家好， 又係我漁風。風高浪急嘅第三季終於結束，大家又能在這艱難投資環境學到D咩呢？今次輪到我分享下自己嘅經驗。
喺6月初，基本上已經平左約40%嘅淡倉， 但因為主趨勢向下， 我自己就一定唔會平曬所有淡倉 。去到六月中，市場開始反彈 ，自己有買到 S&P 500 嘅CALL和小量美股嚟頂住淡倉。 不過去到7月中，我已經開始忍唔住慢慢咁加返淡倉，咁結果正如圖中所見， 畀人夾走一半嘅利潤。 去到8月中，反彈終於完結。 隨著歐美股市跌到今年嘅低位，我個戶口價值又再創新高。
但老實說，我並不太滿意今季嘅表現，因為實在有太多可以改善嘅地方。
1. 太早平掉S&P500嘅CALL，而同時太快加返淡倉，其實喺平長倉嘅時侯，都係一個看淡嘅表現，但自己卻喺同一時間做曬兩樣動作。
2. 趁住今年仲係贏錢嘅心態，嘗試咗好多以前唔用嘅工具 ， 如外匯、債券、期權等等。 本身我相信呢個心態係好嘅，因為用贏嘅錢去嘗試係會比較大膽同埋心理上會覺得就算輸曬都只係當交學費。不過亦因為有呢個所謂大膽嘅心態令到有啲交易根本就係亂嚟 。例如追沽歐元， 喺一啲完全唔值搏嘅位置上沽，結果比人夾到趴係到，係FOMO(淡友mode)嘅表現。
3. 嘗試新工具嘅時候注碼過大，起初細細注時玩嘅時候，都係有贏有輸。但因為冇咩感覺，心紅起黎又開始亂咁落注和加大注碼。
如果我上半年唔喺因為有盈利在手，我諗自己都未必能夠坐穩自己嘅淡倉。幸好最後結果只係蒸發利潤，雖然事後諗番都覺得自己好傻，不過都唔係完全沒有得著。
今次透過比人夾淡倉而知道自己嘅心臟可以承受幾大壓力⋯⋯S&P比人夾到4300嘅時候，我都仲係可以安心瞓覺💤
我係今年先開始接觸期權，雖然只係細細注玩下，但都算係有一個唔錯既回報。

其實今次對我嚟講最大嘅得著並唔係回報，而喺主趨勢嘅重要。例如系統嘅市寬和信號，都一一反映市況。喺9月16號有朋友問我係唔係入市最後機會，我就同佢講係最後逃生機會，跟住比咗呢張圖佢睇。
當見到一片紅海般的 STOP Signal，即使唔沽空，至少都要做好止賺/減倉嘅準備。
即使犯下咁多錯誤，仍然能夠唔洗輸錢，如果沒有漁夫嘅分析、金Sir 嘅課堂和師兄師姐們文章分享，相信是不可能的。我認為在錯誤中學習永遠係學到最多（當然唔係錯到冇可挽救），肯勇於面對自己嘅錯誤 ，再一一改善。未來我相信自己一定會做錯很多決定，但我期望嘅唔係唔錯，係錯少D，輸得細D，贏錢嘅概率自然增加。
感到迷惘嘅時候， 應該抽離一下。心情唔好嘅話就去做啲自己鐘意做嘅嘢。我自己就會打下機同睇卡通片 ，減壓係非常重要的，壓力過大嘅時候做嘅決定通常都係錯。
最後祝大家身體健康，迎接更艱難嘅投資環境。
重要聲明：股市漁夫內的所有內容，包括本影片，絕不構成任何投資意見或購買任何股票及金融產品的特定推薦意見及/或不構成任何游說或要約，以購買、出售或以其他方式交易任何證券、期貨、期權或其他金融工具或其他產品，漁夫系統的內容亦並非就任何個別投資者的特定投資目標、財務狀況及個別需要而編製。投資者不應只按漁夫系統的內容進行投資。用戶必須留意，漁夫系統的所有訊號，並非是買賣訊號或任何投資建議，而所有訊號均是全自動用第三方提供之客觀市場數據計算出來的結果，當中並不涉及任何人為的想法、修改、修訂或任何投資建議。本網站包含的所有內容、資訊、訊號，並不針對任何特定的投資目標、財務狀況以及可能使用或接收該內容的特定人員的特定需求。在作出任何投資決定前，投資者應考慮各種金融產品的個別特點、個人的投資目標、可承受的風險程度及其他因素，並適當地尋求獨立的財務及專業意見。
詳情請重溫股市漁夫FAQ及免責聲明。
最後更新： 2022-10-01
