KL分析本地銀行嘅內地及香港房地產風險佔比，指出大部分銀行嘅風險集中喺三方面，包括借俾發展商嘅貸款、為商業物業做嘅槓桿(gearing)、本地住宅按揭。當前高息口環境加上本港經濟麻麻，令銀行借貸時要承受更大壓力，而本地銀行板塊嘅股價尚未完全反映呢個負面因素。

KL認為，今年應該避開投資本地銀行股，並指市場誤以為之前港美息差擴闊，有助推升本地借貸需求，但而家經濟轉差，銀行反而需要為不良貸款嘅潛在損失做減值撥備(provision)，繼而對今年度嘅財務表現有負面影響。

【名家給力場】2024年忌沾手本地銀行股

勝利瑞柏基金管理合伙人暨投資總監陳建良認為，港股今年已經跌完，估計今年餘下時間可以守住16000關，而呢浸升浪好大機會持續至明年1月中。佢又話，美國聯儲局「放鴿」係支撐港股最主要因素，由於美元下跌，人仔自然有得升，都對港股有提振作用，資金成本亦可望下降。

KL分析指，美國聯儲局11月會議紀錄顯示再加息機會唔大後，美元匯價好快回軟，而市場亦憂慮美國長遠遏通脹嘅能力。此外，全球地緣政治局勢緊張，美元長遠購買力不足令央行持有美國國債、美元資產作為外匯儲備嘅功能存疑。

【Now財經台】美股3大指數今個月強勁反彈，有分析認為，美國迎來「金髮女孩」(Goldilocks)嘅理想景象，即通脹溫和及經濟持續增長。不過，之前提及今年基金經理係部署long美國科技股，喺度平緊倉，依家美股已非常貼近頂部，散戶高追會唔會有風險？

勝利瑞柏基金管理合伙人暨投資總監陳建良直言係非常危險，回顧兩年前，聯儲局宣布會開始加息，兩年後嘅今日就話加夠，利論上「收水」不利股市，「放水」就對股市有利，資金依家就追入，但通脹及美國債息都未必會回落得太多，除中國繼續沽美債，最近30年期國債拍賣反映美債需求唔旺盛，加上近期美國數據急速轉差，睇返依家嘅情況，相信經濟衰退(Recession)好快就出現，亦擔心減息係救唔到。

KL提醒，喺呢個情況下要留意金價，相信金價多次挑戰每盎司2000美元後，最終會喺呢段時間試穿，創歷史新高，縱觀多個資產價格，似乎市場係反映緊對長遠美國通脹嘅憂慮，如果現階段追入美股非常危險，甚至懷疑美股可能已經見頂。

【名家給力場】現階段追入美股好危險

勝利瑞柏基金管理合伙人暨投資總監陳建良認為，9月賭收的確有增長，但唔能夠同去年同期比較，因為去年仍然係疫情管控期間，雖然賺咗錢，但要留意唔少內地遊客已改變咗去香港旅遊嘅模式，就係唔再以消費為主，相信去澳門玩嘅內地旅客都有相同情況，因此，喺呢個改變下賭收要重返疫前水平會比較困難。

勝利瑞柏基金管理合伙人暨投資總監陳建良指，之前都講過恒指會維持上落格局，要扭轉依家嘅局面唔容易，因為香港經濟情況好貼近內地，貨幣政策卻跟隨美國偏向緊縮，兩面夾攻下，港股較難只因估值低而突然翻身。佢又指，市場認為港股成交淡靜係因為北水未回歸，但實際上，即使北水可帶旺成交，但唔代表北水就是買，帶動市場上升。

KL續指，恒指依家已經唔再係區間上落，已明顯突破咗第2、第3季嘅區間，慢慢向下，但突破方式唔係大跌後出現大成交，而係「陰啲陰啲」咁跌，穿底就升少少，之後又跌過，成交愈來愈少。

佢又話，價值投資者唔肯入市，加上之前有外資沽空港股，唔睇好中國經濟又唔肯平倉。如果任意一方調頭，成交理應開始較明顯上升。預期可能要等港股喺大成交下大跌，引相關資金出籠，才有機會扭轉局面。

【名家給力場】北水難扭港股「陰跌」局面

勝利瑞柏基金管理合伙人暨投資總監陳建良相信，蔚來發債行動陸續有來，而其他新興嘅電動車企亦可能會跟住蔚來向市場「伸手」，集資打價格戰。

KL分析指，傳統車廠或電動車企龍頭比亞迪股份(01211)，可以靠傳統汽車銷售提供現金流，但蔚來呢類純電動車企本身好難有正現金流，因此，只能靠減價促銷谷銷量及收入，不過，依家蔚來銷售唔係太理想，現金流入(cash inflow)唔算高，加上公司以前靠服務取勝嘅賣點，唔及依家同業嘅先進技術咁有競爭力。

佢認為，如果蔚來汽車銷量夠秤，大可以向銀行借錢，但公司選擇發債，或意味未來營運現金流未必咁理想。

【名家給力場】電動車企齊做「伸手黨」？