「請注意頁底重要聲明」
大家好，我係漁得水，好耐冇同大家見面。
夏日炎炎，適逢消費券派發，好多人都會利用手上的消費券進行購物，最近我身邊的朋友不約而同問我對於奢侈品（手錶、名牌手袋）的看法，更拋下一句，「得水，你勁喎！高位沽哂啲錶，依家啲錶跌哂價，重入唔入得過呀？」。事緣我年初出了一篇「炒錶好過炒股」文章後，便全心投入炒錶熱潮，加上我一直熱愛做網上買賣，除了手錶外，同時也放賣了一些數年前買入，已經不想再用的名牌手袋，牌子包括：Chanel、Hermes 及LV 等等。由於買賣初期生意不俗，吸引了我父親大人的注意，他發現我確實有點做生意頭腦，而他自覺手上的名錶，如給我放賣，可能賺得比我更多。於是他把自己歷年來倉底的名錶，包括：PP, 標誌著90年代的金撈（金銀潤），IWC，Cartier，拎哂出嚟，交給我處理，並聲稱要錢唔要貨。由於我有做網上買賣經驗，好快便賣出一隻舊版IWC, 其後我舅父更加入戰團，要求我幫忙出售，更願意給我5%作為佣金，一盤網上生意就此誕生。
事緣於2021年底，我發現2019年買入的Rolex yacht master 40mm全新炒價賣到18萬，我掛出了一個17萬的沽盤，最終成交價為16.8萬，因為買家講價，而我第一次做手錶生意，基於誠信，即使後來有人出價更高，我也堅決賣給第一位聯絡我的買家。其後再用同一筆錢（16.8萬）買入綠水鬼126610LV。在我角度相等於錶換錶，但其他人眼中，我用高價買入綠水鬼，行為屬於瘋癲，但意外是入手不到2天，以19.3萬沽出，從此沉醉於研究錶的歷史及買賣，更因為幫我舅父成功將第一代綠水鬼16610LV以23.8萬賣出，令我對玩舊錶有另外一種睇法，年份、錶盤、內圈、機芯，每個微細的環節及變化，都對錶的價值產生影響。
大家應該知道要在AD shop walk in 買到運動型手錶，而且用原價買入，幾乎沒有太大可能。除非市況好差，好似2019年Convid-19 剛剛開始時，我就見過櫥窗放住幾隻運動型手錶任買。話說買錶有個不成文規定，就係要食炒價，又或者你係VVVIP, 已經有一定消費紀錄，可以配一隻錶俾你。一月時，我在香港AD shop 入手的綠水鬼126610LV，就用炒價買。如果用配貨比率計，差不多1:1，當時我在AD shop試錶，有其他熟客見到，即時問點解重有Rolex 賣？但一聽到個價時，即刻擰哂頭，然後話「咁貴，我之前拎咗隻，都係11萬」。
我當時亦深明炒錶遊戲的玩法，如果售價合理，店員都會自己食，點會益街外人，唔通自己有錢唔賺？同時，店員雖然相信炒風會持續，但若然睇錯後市，錶賣唔出，資金套死，都係麻煩。而且當時買入Rolex, AD shop 的經理需要做background check, 要買家留name card ，需要審批等等，搞到成個感覺好似有錢都唔一定賣俾你，重日日海鮮價。我當時問了好幾間shop, 同一款錶，有16.8萬，有17.4萬，也有18.3萬。如果用炒股票的角度看，個price spread 好寬，亦代表有水位。
(下圖是綠水鬼126610LV今年1月的買賣價)
有了我爸的貨源，我有了一個初步構思，我希望透過這些錶，提高我網店的生意額及好評。首先我要知道這些錶在二手市場的價格，及我爸當年買入的成本價。由於我爸對手錶保養的知識有限，部分手錶更出現氧化情況，而且配件不齊，有些缺盒、有些缺證書，大部分不是full set, 在沒有serial no 提供下，其實好難確定錶的真實價格，因為舊款的外型太相似，有時錶盤不同，型號就不同。於是我拍下照片，WhatsApp問二手店，順便求報價。
當我已經有確定的市場資訊後，就需要定出賣價。於是我需要知道我爸對每隻錶的售價是否已有認知。當然他跟一般人沒兩樣，回了一句「當然越貴越好啦！」。我心諗，大件事，通常現實與幻想，一定有落差。因為他完全不知道自己的錶在狀態、款式以及外觀包裝上都出現了嚴重問題。在他眼裏，你嗰啲又係「勞」，我嗰啲又係，點解你賺到錢，我賺唔到？這個觀點對投資好重要，市代的變遷，就有如股票世界，20年前的股王，往往不是今天的股王。
為了提高手錶的質素，我將過了保養期的錶重新進行維修保養。就如一隻股票，再優質，沒有好的故事包裝、新聞，好難吸引投資者的眼球。但重點是未見官先打300大板，我幫人賣錶，錶未賣出，還要自己先掏出三數千元搞保養、換錶帶。最後我還做了一些背景整合，配合拍賣行對同款手錶的最新成交，做了一些產品描述及包裝，成功吸引了一個外國買家的注意，經過一輪討價還價後，一隻換了原裝亮面鱷魚皮帶的vintage PP手錶，在冇盒冇證書的情況下，以高出成本價30%賣出。這次交易，我確實獲益良多，得到更多睇法。
話說賣錶初期，由於價格炒到飛天，$40000買入的普通版Rolex 369，戴了9年，也成功以$55000賣出。記得我老友同我講，做你呢行，出去見客，點都要留一隻ROLEX起身！我好記得，就係我老友呢句說話，我更確定錶市短期見頂，加速我將所有手錶賣出的決心。
4月初，經過網上的大量宣傳，部份人以為炒錶有利可圖，跟勢追入。連我公司的同事都問我sea dweller 個價抵唔抵？我當時反問佢，究竟你想買邊一代? 錶係要全新，即月保養咭，定NOS(new old stock 買家未拆膠，未改帶貨）？當然佢唔知自己想要乜，只係人炒佢又炒，我話「勞」價已經開始跌，唔抵買，佢先話再睇睇。就好似炒股票咁，人買你又買，冇步署，冇計劃，其實風險好大，好容易出事。
最後我認為炒錶同投資股票一樣，心態非常重要。好多人投資，希望賺到盡，賺盡每一分一毫，其實我們無法準確預測未來，正如去澳門賭錢，連續開了三鋪大，第四鋪開大的機會率仍然是50/50，只不過我們主觀的意願認為第四鋪開大的機會率仍然高，相信旺勢會持續。由於對未來有不確定性，價格走勢是否會持續向上，沒有正確答案。我們只需要知道自己可以接受的買入或賣出價，賺多賺少就當成經驗的累積。
重要聲明：股市漁夫內的所有內容，包括本影片，絕不構成任何投資意見或購買任何股票及金融產品的特定推薦意見及/或不構成任何游說或要約，以購買、出售或以其他方式交易任何證券、期貨、期權或其他金融工具或其他產品，漁夫系統的內容亦並非就任何個別投資者的特定投資目標、財務狀況及個別需要而編製。投資者不應只按漁夫系統的內容進行投資。用戶必須留意，漁夫系統的所有訊號，並非是買賣訊號或任何投資建議，而所有訊號均是全自動用第三方提供之客觀市場數據計算出來的結果，當中並不涉及任何人為的想法、修改、修訂或任何投資建議。本網站包含的所有內容、資訊、訊號，並不針對任何特定的投資目標、財務狀況以及可能使用或接收該內容的特定人員的特定需求。在作出任何投資決定前，投資者應考慮各種金融產品的個別特點、個人的投資目標、可承受的風險程度及其他因素，並適當地尋求獨立的財務及專業意見。
